Halla Sansaar (हल्ला संसार)

बलात्कार अभियोगमा ३ नेपालीलाई २० वर्ष जेल

नयाँदिल्ली, पुस ३ - रोजीरोटी खोज्दै पश्चिम नेपालबाट भारतको हिमाञ्चल पुगेका तीन नेपालीविरुद्ध एक अमेरिकी महिलालाई बलात्कार गरेको अभियोगमा कुल्लुस्थित जिल्ला अदालतले २० वर्षको जेल सजाय सुनाएको छ ।
पेसाले ट्रक ड्राइभर र सहयोगी रहेका तीनैजना नेपाली लामो समयदेखि हिमाञ्चलमा रोजगारीमा रहेको कुल्लु प्रहरीको अभियोग दर्ता (एफआईआर) मा उल्लेख छ । गत जुन ४ को मध्यरातमा मनालीबाट ८ किलोमिटर टाढाको वशिस्ट गाउाबाट ट्रकमा लिफ्ट लिएकी अमेरिकी युवतीलाई पाल्चन भन्ने स्थानमा लगेर तीन जनाले बलात्कार गरेको र युवतीका साथमा रहेको क्यामेरा, मोबाइल, ५ हजार भारुसमेत लुटेको आरोप छ ।
हिमाञ्चल प्रहरीका एसपी विनोद धवनका अनुसार तीनै जनालाई जनही १० हजार भारुका दरमा जरिवानासमेत तोकिएको छ । जरिवाना बुझाउन नसके जेल सजाय अरू थपिनेछ । सोमबहादुर, लक्की र अर्जुन नाम राखेर अमेरिकी युवतीले जुन ४ मा दर्ता गराएको एफआईआरमा यिनीहरूको पूरा ठेगाना खुलाइएको छैन । यो घटनाको दुई दिनपछि मनालीबाट पक्राउ परेका तीन जनामाथि लगाइएको आरोपमा १७ जना साक्षीको बयान लिइएको थियो ।
जिल्ला अदालतको सजायविरुद्ध उनीहरू पुनरावेदनमा जान सक्ने बताइएको छ । घटना र अदालती निर्णयबारे दिल्लीस्थित नेपाली दूतावासलाई जानकारी आएको छैन ।

Tags: Crime