Tuesday, December 10, 2013
पत्नी हत्याको आरोपमा एक सैनिक पक्राउ: युवती बेचेको आरोपमा तीन प्रहरीको नियन्त्रणमा
महिला हिंसा विरुद्धको १६ दिने अभियान जारी रहेकै बेला अछाममा महिला हिँसाका दुई वटा घटना सार्वजनिक भएका छन् ।
एउटा घटनामा श्रीमान्ले श्रीमतीको हत्या गरेको आरोप लागेको छ भने अर्को घटनामा विवाह गर्ने भन्दै भारतमा लगेर बेचेको भन्ने उल्लेख छ। दुवै घटनाका बारेमा जिल्ला प्रहरी कार्यालय अछाममा किटानी जाहेरी दर्ता भएको प्रहरीले बताएको छ।
श्रीमतीको हत्या आरोप लागेका श्रीमानलाई प्रहरीले पक्राउ गरेको छ। अछाम सदरमुकाम मंगलसेन गाविस घर भई ज्वालादल गण सूर्यबिनायक भक्तपुरमा कार्यरत नेपाली सेनाका जवान ३२ वर्षीय झनक भाट पत्नी हत्याको आरोपमा पक्राउ परेका हुन।
उनकी पत्नी २८ बर्षीया कोकिला भाटको मंसिर २० गते राति हत्या गरेको भन्दै माइती पक्षले जाहेरी दिएपछि जिल्ला प्रहरी कार्यालय अछामले पक्राउ गरेको हो।
घर बिदामा आएका भाटले आत्महत्या गरेको भन्ने पारेर पत्नीको हत्या गरेको आरोप लगाउँदै मृतकका दाजु राजाराम भाटले किटानी जाहेरी दर्ता गराएको जिल्ला प्रहरी कार्यालय अछामले जनाएको छ।
कोकीलाका माईती पक्षले २१ गते नै प्रहरीमा ठाडो निवेदन दिएका आधारमा प्रहरीले उनलाई गिरफ्तार गरेर हिरासतमा राखेको छ।
भाटले काठ्माण्डौमा अर्को बिहे गरेर राखेकाले पत्नीको हत्या गरेको माईती पक्षले दावी गरेका छन्।
मृतक भाट घाँटीमा पासो लगाएर सुत्ने खाट माथि पल्टिएको अवस्थामा फेला परेको प्रहरीले बताएको छ। हत्या आरोपीले आत्महत्या गरेको थाहा पाएपछि बचाउने प्रयासमा आफैले डोरी काटेको प्रहरीसँग बयान दिएको बताईएको छ।
मृतक भाटका दुई छोरा र दुई छोरी छन्। मृतककी जेठी छोरीले आमाबुबाबीच केही दिनदेखि झगडा हुने गरेको र सो रात पनि अबेरसम्म झगडा भएको प्रहरीसँगको बयानका क्रममा बताएको समाचार स्रोतले जानकारी दिएको छ।
प्रहरीले भाटलाई थप अनुसन्धानका लागि आइतबार नै जिल्ला अदालतबाट हिरासतमा राख्न १० दिन म्याद थप गरिसकेको जनाएको छ।
त्यसैगरी, जिल्ला जिल्ला प्रहरी कार्यालय अछाममा विवाह गर्ने बहानामा भारत पुर्याएर बेचेको आरोपमा एक जना विरुद्ध किटानी जाहेरी दर्ता भएको छ।
अछामको नन्देगडा गाविस वडा नम्बर ५ की १७ वर्षीया निर्मला खत्रीलाई भारत लगेर बेचेको आरोपमा नवाठाना गाविसका २० वर्षीय मुकेश रावलका नाममा किटानी जाहेरी दर्ता गरिएको छ।
निर्मलाका दाजु खम्म खत्रीले विवाह गर्ने बहानामा आफ्नी बहिनीलाई भारत लगेर बेचेको भन्दै जिल्ला प्रहरी कार्यालय अछाममा किटानी जाहेरी दर्ता गराएका हुन्।
बैशाख १० गते भारतको गुजरात लगेकोमा हाल रावलका परिवार मात्रै फर्केकाले निर्मलाको अवस्था हाल अज्ञात रहेको बताईएको छ।
भारतमै बेचेको भन्ने कुरा खुल्न आएकोले पक्राउ गरी अनुसन्धान गर्न जाहेरीमा माग गरिएको जिल्ला प्रहरी प्रमुख डिएसपी श्यामप्रसाद पौडेलले जानकारी दिए।
मुकेश रावल र उनका आमाबुबालाई जिल्ला प्रहरी कार्यालय कैलालीले मंसिर १४ गते नियन्त्रणमा लिएको छ। उनीहरु अहिले पनि जिल्ला प्रहरी कार्यालय कैलालीकै नियन्त्रणमा रहेका छन्।
मुकेशका परिवारले निर्मलाले आत्महत्या गरेको बताएका छन्। उनीहरुले मुकेश र निर्मलाबीच बैशाख महिनामा विवाह भएको बताएका छन्।
मुकेशका परिवारले निर्मलाले आत्महत्या गरेको कुनै प्रमाण देखाउन सकेका छैनन्। उनीहरुले कानूनी झण्झटका कारण लुकिछिपी दाहसंस्कार गरेको भन्ने जवाफ दिएको निर्मलाका माइती पक्षले जानकारी दिएका छन्।
.jpg)
0 Responses to “पत्नी हत्याको आरोपमा एक सैनिक पक्राउ: युवती बेचेको आरोपमा तीन प्रहरीको नियन्त्रणमा”
Post a Comment