Halla Sansaar (हल्ला संसार)

अन्तर्घातको आरोपपछि झलनाथले अध्यक्षता छाडे, गौतमले सम्हाले

२७ मंसिर, काठमाडौं । एमाले केन्द्रीय समितिको बुधबारको बैठकको सुरुमै मंगलबार केन्द्रीय सदस्य कृष्णगोपाल श्रेष्ठले अध्यक्ष झलनाथ खनालमाथि लगाएको आरोपलाई लिएर विवाद भयो । मंगलबार आफ्नो भनाई राख्नेक्रममा श्रेष्ठले आफू चुनाव लडेको काठमाडौं ९ मा अन्तर्घात भएको र त्यसमा अध्यक्ष खनाल पनि मुछिएको आरोप लगाएका थिए ।
उम्मेद्वारी चयनका बेला आफू उपत्यका इन्चार्ज भएपनि थाहै नदिई सो क्षेत्रमा खनालको नाम एक नम्बरमा राखेर पचार गरिएको र चुनावका बेलासम्म पार्टीका र अध्यक्षका छुट्टाछुट्टै कार्यकर्ताका रुपमा निर्वाचन परिचालन भएको श्रेष्ठले बताएका थिए । आफूमाथि अन्र्तघातको आरोप लागेपछि अध्यक्ष खनालले बुधबारको बैठकमा केन्द्रीय सदस्इ कृष्ण गोपाललाई कारबाही नगरेसम्म आफूले बैठकको अध्यक्षता नगर्ने अडान राखेका थिए ।
अध्यक्ष खनालले श्रेष्ठमाथि कारबाहीको प्रस्ताव अघि ल्याएपछि बैठकमा भनाभन भएको थियो । ‘म माथि गम्भिर आरोप लगाइएको छ, कि यो आरोप पुष्टि गर्नुपर्‍र्यो नभए आरोप लगाउनेमाथि कारबाही नगरेसम्म म बैठकको अध्यक्षता गर्दिनँ,’ बैठकमा अध्यक्ष खनाललाई उद्धृत गर्दै स्रोतले भनेको नयाँ पत्रिकामा खबर छ ।
खनालको यस्तो भनाई आएपछि आफू सजाय भोग्न तयार भएको भन्द्र श्रेष्ठले आफूमाथि षडयन्त्र र अन्तर्घातमा अध्यक्षको नाम पनि जोडिएको जिकीर गरे । ‘म पछि हट्दिन, ममाथि कारबाही हुन्छ भने होस्, तर म सत्य कुरा बोल्छु, अन्तर्घात र षडयन्त्र पनि गर्ने र अहिले यसबाट उम्कन खोज्ने ?’ श्रेष्ठको भनाई उदृत गर्दै बैठक स्रोतले भन्यो ।
विवादका कारण अध्यक्षले बैठकको अध्यक्षता नलिने अडान लिएपछि उपाध्यक्ष बामदेव गौतमले श्रेष्ठबारेको विवादमा बैठकको अध्यक्षता गरेका थिए । गौतमको अध्यक्षतामा भएको बैठकमा खनालमाथि लागेको आरोप अस्वीकार गर्दै पार्टीभित्रको अन्तर्घातका विषयमा तल्ला कमिटीबाटै प्रतिवेदन मागेर छानविन गर्ने सहमति भएको थियो । सोही सहमति अनुरुप एमालेले निर्वाचन परिचालन र परिणामसम्बन्धी प्रतिवेदन गर्न अञ्चल र जिल्ला कमिटीलाई निर्देशन दिएको छ ।

Tags: Politics